فوتو: ۇلتتىق ۇلان
جاڭا جىل قارساڭىندا ۇلتتىق ۇلاننىڭ باس قولباسشىسى گەنەرال-مايور اڭساعان بالتابەكوۆ مەرزىمدى اسكەري قىزمەتىن وتەپ جۇرگەن ساربازداردىڭ بەس ارمانىنىڭ ورىندالۋىنا سەبەپشى بولدى.
اسكەر قاتارىندا ارنايى ساۋالناما جۇرگىزىلىپ, ساربازدار ءوز تىلەكتەرىن بۇكپەسىز, اشىق جەتكىزگەن ەدى. الايدا, ولار ونىڭ ءىس جۇزىندە ورىندالاتىنىن كۇتپەسە كەرەك. ماسەلەن, تاراز قالاسىنداعى 5513 اسكەري بولىمىنىڭ اسكەري قىزمەتشىسى الەكساندر ميروشين بۇرىن-سوڭدى ۇشاققا ءمىنىپ كورمەگەنىن ايتىپ, كوككە كوتەرىلۋدى ارماندايتىنىن جازعان. ونىڭ بۇل تىلەگى ورىندالدى. ۇشۋدىڭ العاشقى ساتتەرىنەن-اق ساربازدىڭ قۋانىشى مەن تولقۋى ايقىن بايقالدى. شىنايى باقىت, قۋانىش سەزىمى ونى بۇكىل ساپار بويى جەتەلەپ وتىردى.
جاڭا جىلدىق قۋانىش مۇنىمەن اياقتالعان جوق. قونعان ساتتەن كەيىن الەكساندردى تاعى ءبىر توسىن سىي كۇتتى, ول اناسىمەن قاۋىشتى.
ساربازدىڭ اناسى ناتاليا ميروشينا بۇل كۇنى تەك ۇلىنىڭ عانا ەمەس, ءوزىنىڭ دە ارمانى ورىندالعانىن جەتكىزدى. سەبەبى اسكەردەگى بالاسىمەن جۇزدەسۋ – جاڭا جىلدا كوپ وتباسىلار اڭسايتىن ەڭ قىمبات سىي.
ال الماتى قالاسىنداعى 5571 اسكەري بولىمىنىڭ اسكەري قىزمەتشىسى رايىمبەك باقىتبەك شوكولاد ونىمدەرىنىڭ قالاي دايىندالاتىنىن كورگىسى كەلەتىنىن جەتكىزگەن. باس قولباسشىنىڭ جاڭا جىلدىق تارتۋى رەتىندە وعان ەلىمىزدەگى تانىمال «راحات» كونديتەرلىك فابريكاسىنا ەكسكۋرسيا ۇيىمداستىرىلدى. سارباز ءتاتتى ونىمدەردىڭ ءوندىرىس تەحنولوگياسىمەن تانىسىپ, ەلدىڭ تانىمال برەندىنە اينالعان فابريكانىڭ جۇمىسىن كوزىمەن كوردى.
سونداي-اق الاتاۋ قالاسىنداعى 6654 اسكەري بولىمىندە قىزمەت ەتەتىن داستان نۇرلان جاڭا جىل قارساڭىندا بۇكىل روتاسىنا مەرەكەلىك كوڭىل كۇي سىيلاۋ ماقساتىندا, تىلەۋى ءبىر جاشىك ماندارين دەپ كورسەتكەن. ۇلتتىق ۇلان باس قولباسشىسىنان كەلگەن سالەمدەمەنى ول قارۋلاس دوستارىمەن ءبولىسىپ, بولىمشەگە ورتاق قۋانىش سىيلادى.
وسكەمەن قالاسىنداعى 5518 اسكەري بولىمىنىڭ قاتارداعى جاۋىنگەرى ەلەربەك سۇلتانقۇلوۆ سۋرەت سالۋعا دەگەن قىزىعۋشىلىعىن قايتا جانداندىرعىسى كەلەتىنىن ايتقان. ونىڭ تىلەگى كۇتپەگەن ءارى اسەرلى ساتتە ورىندالدى. شىعارماشىلىققا ارنالعان قۇرال-جابدىقتار كەشكى تەكسەرىس كەزىندە تابىستالدى. بۇل سارباز ءۇشىن ەرەكشە ەستە قالارلىق ءسات بولدى.
وسى اسكەري بولىمدە قىزمەت ەتەتىن قاتارداعى جاۋىنگەر جۇنىس قاراباەۆتىڭ تىلەگى دە كوپشىلىكتىڭ جۇرەگىن ەلجىرەتتى. ول وتباسىنىڭ سۋرەتى بەينەلەنگەن شىنىاياق ارمانداعان. گەنەرال-مايور اڭساعان بالتابەكوۆ تابىستاعان بۇل سىي سارباز ءۇشىن تۋعان ءۇيىن, جاقىندارىن الىستا ءجۇرىپ سەزىلەتىن جىلۋلىقتى ەسكە سالاتىن قىمبات بەلگىگە اينالدى.
ايتا كەتسەك, ۇلتتىق ۇلانىندا مەرزىمدى اسكەري قىزمەتشىلەر ماتەريالدىق تۇرعىدان عانا قامتاماسىز ەتىلمەيدى. ولاردىڭ مورالدىق-پسيحولوگيالىق جاعدايىنا دا ەرەكشە كوڭىل بولىنەدى. ءاربىر ساربازعا دەگەن قامقورلىق – قىزمەتتىڭ ماڭىزدى قۇرامداس بولىگى. ال جاڭا جىل قارساڭىندا ورىندالعان تىلەكتەر ساربازدارعا اسكەردەگى كەزەڭدەردىڭ جارقىن ءارى جىلى ەستەلىگىنە اينالاتىنى ءسوزسىز. وسىنداي ساتتەردە قولباسشىلىق تاراپىنان كورسەتىلگەن قولداۋ مەن جاناشىرلىقتىڭ ماڭىزى ارتا ءتۇسىپ, اسكەري قىزمەتشىلەرگە دەگەن قامقورلىقتىڭ ءاردايىم باستى نازاردا ەكەنىن ايقىن كورسەتەدى.
